Comezou o EpdLAB II como acabamos o curso pasado: cheos de enerxía e con ganas de aprender. Aprender que en galego é un verbo que vai nas dúas direccións. Porque se algo aprendimos na anterior edición foi que en proxectos coma este apréndese moito e ben.

Apréndese na busca de historias, de dinámicas e de ferramentas, de fórmulas que sirvan para achegar os contidos á rapazada. Apréndese das conversas, dos debates e dos comentarios que xorden nas clases, das conclusións ás que chegamos e das preguntas ás que nos costa atopar resposta e que non sempre resolvemos.